Սպիտակ տունը համաձայն չէ ուկրաինական իշխանությունների այն գնահատականներին, թե Պուտինը չի հարձակվելու

Սպիտակ տունը կարծում է, որ պաշտոնական Կիևի դիրքորոշումը Ռուսաստանի կողմից իրավիճակի սրման սպառնալիքի բացակայության վերաբերյալ հակասում է սահմանին Ռուսաստանի Դաշնության իրական գործողություններին։ Այս մասին հունվարի 25-ին կայացած ճեպազրույցում հայտարարել է Սպիտակ տան մամուլի քարտուղար Ջեն Փսակին։

Լրագրողներից մեկը խնդրել է Փսակիին՝ մեկնաբանել ուկրաինացի պաշտոնյաների, մասնավորապես՝ Ուկրաինայի ազգային անվտանգության և պաշտպանության խորհրդի քարտուղար Ալեքսի Դանիլովի խոսքերը, թե Կիևը պատճառ չի տեսնում խոսելու ռուսական լայնամասշտաբ ներխուժման պլանների մասին։

«Ոչ ոք չի կարող մտնել նախագահ Պուտինի և Ռուսաստանի ղեկավարության գիտակցության մեջ: Ի՞նչ ենք մենք տեսնում, տարբեր վարժանքներ, ներառյալ՝ սահմանին ռուս զինվորականների առկայություն»,- պատասխանել է Փսակին:

Նա նաև հավելել է, որ Մոսկվայից շարունակվում է ագրեսիվ հռետորաբանությունը։ «Մենք սահմանին ագրեսիվ գործողությունների և նախապատրաստական աշխատանքների աճ ենք տեսնում»,- ասել է Փսակին։