Քոչարյանի պաշտպանները կրկին ինքնաբացարկ են հայտնել 3-րդ դատավորին

ՀՀ  երկրորդ նախագահ Ռոբերտ Քոչարյանի խափանման միջոցի հարցը քննող դատավոր Արթուր Մկրտչյանին այսօր Քոչարյանի պաշտպանները երկրորդ ինքնաբացարկի միջնորդությունը ներկայացրեցին։

Լրագրողների հետ զրույցում Քոչարյանի պաշտպաններից Արամ Օրբելյանը հայտնեց, որ ինքնաբացարկի միջնորդություն է ներկայացվել` հաշվի առնելով այն հանգամանքը, որ հստակ չէր` ինչի հիման վրա է Արթուր Մկրտչյանը նշանակվել սույն գործով դատավոր:

«Տոնական օրերին ունենք ութ հերթապահ դատավոր, որոնցից մեկին մակագրվել է միջնորդությունների քննությունը, բայց ինչի հիման վրա է գործը քննելու հենց Մկրտչյանը, պարզ չէ, և ոչ էլ համակարգչային ընթացակարգով է ընտրվել նա»,- ասաց Օրբելյանը:  

Բացի այդ, ըստ պաշտպանի, ինքնաբացարկ է ներկայացվել` հաշվի առնվելով նախորդ դատավորի ինքնաբացարկի փորձը, երբ դատարանը հիմք էր ընդունել դատարանի ձևավորման հնարավոր սխալը։

Հիշեցնենք, որ երեկ պաշտպանները Արթուր Մկրտչյանին ինքնաբացարկի միջնորդություն էին ներկայացրել` հաշվի առնելով այն հանգամանքը, որ Մկրտչյանն ու Քոչարյանի պաշտպան Արամ Օրբելյանը սերտ հարաբերություններ ունեն: