Քոչարյանի խափանման միջոցը քննող դատավորին պաշտպանները ինքնաբացարկի միջնորդություն են ներկայացրել

Տեղեկացրել էինք, որ Երևանի ընդհանուր իրավասության դատարանի Կենտրոնի նստավայրում ընթանում է ՀՀ երկրորդ նախագահ Ռոբերտ Քոչարյանի գործով դատական նիստը։ Դատարանն այսօր քննում է երկու միջնորդություն՝ Ռոբերտ Քոչարյանի պաշտպանների միջնորդությունը Քոչարյանի նկատմամբ գրավ կիրառելու վերաբերյալ և ՀՔԾ-ի միջնորդությունը Քոչարյանի կալանքը ևս երկու ամսով երկարացնելու վերաբերյալ։ 

Քոչարյանի փաստաբաններից Արամ Օրբելյանը լրագրողների հետ զրույցում հայտնեց, որ գործը քննող դատավոր Արթուր Մկրտչյանին ինքնաբացարկի միջնորդություն են ներկայացրել: Նրա խոսքով` ինքնաբացարկի միջնորդություն են ներկայացրել` հիմք ընդունելով դատավորի, նրա ընտանիքի և իր միջև առկա կապը: «Մենք բավականին երկար ժամանակ լավ շփումներ ենք ունեցել, որոշ ժամանակ դասընկերներ ենք եղել, միասին դաշնամուրի ենք գնացել… Բացի այդ` դատավորը շատ ջերմ հարաբերություններ ունի իմ կնոջ քեռու հետ, որի ընտանիքի հետ նույնպես ունենք շատ մոտիկ ընկերական հարաբերություններ: Ուղղակի Կապանը փոքր քաղաք է, և մենք էլ համերկրացիներ ենք: Կասկածի տակ չդնելով օբյեկտիվ անկախության էլեմենտը, այդ թվում` հաշվի առնելով, որ գրավի հարցը պետք է քննի դատարանը, կապերի այդ բազմազանությունը գուցե քննարկման առիթ տար»,- ասաց Օրբելյանը: