2,5 մլրդ դրամի պետական պայմանագրեր է կապել ՔՊ կուսակցության անդամ Եղիազար Վարդանյանի կնոջ ընկերությունը

Կառավարությանն առընթեր Քաղաքաշինության կոմիտեն, որը պատասխանատու է շինարարության ոլորտի լիցենզավորման և բնակարանային ֆոնդի կառավարման համար, 2024 թվականի մարտից ղեկավարում է Եղիազար Վարդանյանը։

Մինչ կոմիտե նշանակվելը, Վարդանյանը ղեկավարել է Ճարտարապետության և շինարարության համալսարանը (2020-2024թթ.)։ Նույն ժամանակահատվածում նրա կինը՝ Նարինե Հակոբյանը, եղել է «Մոդուլ» ՍՊԸ-ի տնօրենը և սեփականատերը։ Ընկերությունը մատուցում է ծառայություններ շինարարության ոլորտում, այդ թվում՝ անկախ փորձաքննություն։

Վիճակագրության համաձայն, Հակոբյանի՝ տնօրեն աշխատելու ընթացքում (2020-2024թթ.) «Մոդուլ» ՍՊԸ-ն ստորագրել է 51 պայմանագիր պետական կառույցների հետ։ Ընկերությունը գործում էր նաև 2015-2020 թվականներին, սակայն այդ ժամանակ ուներ ընդամենը մեկ պետական պայմանագիր։

2024 թվականի հուլիսին Հակոբյանը հրաժարական է տվել, և տնօրեն է նշանակվել Փայլակ Կարապետյանը։ Կարապետյանը ներկայումս համատեղում է աշխատանքը «Մոդուլ»-ում և Ճարտարապետության համալսարանում, որտեղ ղեկավարում է ֆինանսական վարչությունը։