Դինքի ընկերները բողոքի ցույց են կազմակերպել Ստամբուլի Արդարադատության պալատի շենքի առջև

Պոլսում լույս տեսնող «Ակօս» թերթի գլխավոր խմբագիր Հրանտ Դինքի սպանության բացահայտման գործով դատավարության 9-րդ նիստի ընթացքում «Հրանտի ընկերներ» նախաձեռնության անդամները հերթական բողոքի ցույց են կազմակերպել Ստամբուլի Չաղլայան արդարադատության պալատի առջև:

Ըստ «Ակօս»-ի՝ «Հրանտի ընկերներ»-ի անունից հայտարարությամբ հանդես եկած Բյուլենթ Այդընը նշել է, որ պետությունն ու ոճրագործները միասին են գործել Դինքի սպանության մանրամասները թաքցնելու և դատավարության՝ արդար պայմաններում իրականացման գործընթացին խանգարելու հարցում: 

Հայտարարության մեջ Այդընը շեշտել է, որ մինչև դատախազության կողմից սպանության մեղքը Գյուլենական շարժման վրա բարդելու մտահղացումը,  պետությունը ոչինչ չի ձեռնարկել սպանությունը բացահայտելու ուղղությամբ, ավելին՝ միահամուռ ուժերով կոծկել է այն: