Նախարարներն Ամանորի նախաշեմին կայցելեն զորամասեր

Այսօր կառավարության նիստի ավարտին Հովիկ Աբրահամյանը հայտարարեց, որ ՊՆ-ն առաջարկել է, որ նախարարներն ու գերատեսչության ղեկավարները Նոր տարվա նախաշեմին այցելեն զորամասեր: Վարչապետն առաջարկեց հավաքել այդ թեմայով բոլոր առաջարկությունները և ի մի բերել կարճ ժամկետում:

«Ովքեր ցանկություն ունեն, և լավ կլինի, որ բոլորն այդ ցանկությունն ունենան, այցելեն որևէ զորամաս: Դա կարևոր է ու, բարոյական առումով, ճիշտ»,- ասաց վարչապետը:

Պաշտպանության նախարար Սեյրան Օհանյանը նշեց, որ, հաշվի առնելով անցած տարվա փորձը, առաջարկել են այցելել կա'մ մոտ զորամասեր, կա'մ հայրենի բնակավայրի զորամասեր: Նաև առաջարկվում է այցելել ոչ միայն զորամասեր, դիրքեր, այլ նաև սահմանամերձ բնակավայրեր: Սեյրան Օհանյանը նշեց, որ արդեն կազմել են ցուցակները: «Լավ կլինի ասեն, թե ով որտեղ է գնալու, որ ուղեկցենք»,- ասաց պաշտպանության նախարարը:

Հիշեցնենք, որ սա առաջին դեպքը չէ, երբ նախարարներն այցելում են զորամասեր: