Հունաստանը խստացնում է հարկային քաղաքականությունը

Հունաստանի խորհրդարանը այս գիշեր հավանություն է տվել հարկային խիստ քաղաքականություն սահմանող օրինագծին: Կողմ են եղել 300 պատգամավորներից 163-ը. տեղեկացնումէ ВВС-ն:

Օրենքը ենթադրում է մեծ եկամուտներ ունեցողների հարկերի բարձրացում. տարեկան 42000 եվրոյից ավելի եկամուտը հարկվելու է 42 տոկոսով: Միաժամանակ նվազում է թոշակառուներից եւ պետծառայողներից հարկումը, սակայն հարկ է սահմանվում նախկինում հարկերից ազատվածների համար, օրինակ ` ֆերմերների:

Երկրի իշխանությունները հույս ունեն, որ նման միջոցառումներով կօգնեն կառավարությունը մինչեւ տարեվերջ լրացուցիչ 2,3 մլրդ եվրո հավաքել: «Մենք գոհ չենք, որ բարձրացնում ենք հարկերը, սակայն դա անհրաժեշտ է  երկիրը ճգնաժամից դուրս բերելու համար»,- Associated Press-ին ասել է Հունաստանի ֆինանսների նախարար Գիորգոս Մավրագանիսը: