ՀԱՊԿ «Որոնում-2026» զորավարժության ընթացքում հետախուզական խմբերը սկսել են գործնական գործողություններ

Ռուսաստանի Դաշնությունում՝ «Չեբարկուլսկի» զորավարժարանում, ՀԱՊԿ հետախուզական ուժերի և միջոցների «Որոնում-2026» հատուկ զորավարժության շրջանակում հետախուզական խմբերը սկսել են նշանակված տարածքներում գործնական գործողությունների իրականացումը։

«Որոնում-2026» հատուկ զորավարժության թեման սահմանամերձ զինված հակամարտության տեղայնացման ընթացքում հետախուզական մարմինների ուժերով և միջոցներով հետախուզության կազմակերպումն ու իրականացումն է։

Զորավարժության հիմնական նպատակն է ՀԱՊԿ Հավաքական արագ արձագանքման ուժերի կիրառման շահերից ելնելով տարբեր տեսակի հետախուզության իրականացումը, ինչպես նաև հետախուզական ստորաբաժանումների կառավարման մարմինների և անձնակազմի գործնական հմտությունների կատարելագործումը։

Նախապես տեղակայված հետախուզական ստորաբաժանումներն իրականացնում են պայմանական հակառակորդի հայտնաբերում։ Հայտնաբերված օբյեկտներին կրակային հարվածներ հասցնելու ընթացքում խմբերն օգտագործում են հետախուզական և հարվածային FPV անօդաչու թռչող սարքեր, ինչպես նաև ուղղորդում են հրետանու և ավիացիայի կրակը՝ հայտնաբերված օբյեկտները ոչնչացնելու համար։

Միաժամանակ հետախուզության կառավարման մարմինները հավաքագրում, վերլուծում և ընդհանրացնում են ստացված տեղեկությունները և դրանք փոխանցում ՀԱՊԿ Հավաքական արագ արձագանքման ուժերի հրամանատարությանը՝ հնարավորություն տալով կիրառել «հայտնաբերել՝ խոցել» սկզբունքը։

Զորավարժության ընթացքում առաջադրանքները պլանավորելիս և դրանց կատարման եղանակներն ընտրելիս հետախույզները հաշվի են առնում ժամանակակից զինված հակամարտությունների ընթացքում ռազմական գործողությունների փորձը։