Իշխանությունում չեն կողմնորոշվում. «Հրապարակ»

«Հրապարակ» թերթը գրում է.

«Չնայած շաբաթներ առաջ ԿԸՀ նախագահ Վահագն Հովակիմյանը հայտարարեց, որ Երեւանի ավագանու ընտրությունները, ըստ ամենայնի, կնշանակվեն սեպտեմբերի 17-ին՝ բացատրելով․

«Հերթական ընտրությունները նախատեսվում են սեպտեմբերի 10-20-ն ընկած ժամանակահատվածում, եւ այդ տասնօրյակում սեպտեմբերի 17-ն է ընկնում կիրակի», սակայն իշխանության մեր աղբյուրներն ասում են, որ որոշումը դեռ վերջնական չէ, քննարկում են նաեւ սեպտեմբերի 10-ը, որպեսզի քարոզարշավն ամռան ճռճռան տապին ընկնի։ Հույս ունեն, որ ՔՊ-ի մրցակիցները չեն կարողանա ակտիվ քարոզարշավ անել, երեւանցիներն էլ չեն մասնակցի հավաքներին։

Սեպտեմբերի 17-ին ընտրություններ անցկացնելու դեպքում քարոզարշավը կսկսվի օգոստոսի վերջին, քանի որ Երեւանի քաղաքապետի թեկնածուների գրանցումը կատարվում է ընտրություններից ոչ շուտ, քան 35, եւ ոչ ուշ, քան 30 օր առաջ։ Իսկ թեկնածուների գրանցումից հետո՝ վերջին օրվան հաջորդող 5-րդ օրը սկսվելու է թեկնածուների քարոզարշավը։

Այսինքն՝ օգոստոսի 23-ից կսկսվի քարոզարշավը, մինչդեռ սեպտեմբերի 10-ին ընտրություն անելու դեպքում կսկսվի օգոստոսի 13-ից»:

Ամբողջությամբ հոդվածը՝ «Հրապարակ» օրաթերթի այսօրվա համարում