«Մոտենում ենք առաջ, բայց շենքը չենք շրջափակում». «Դիմադրություն» շարժման մասնակիցներն ԱԳՆ-ի դիմաց են

«Դիմադրություն» շարժման մասնակիցները այսօր՝ մայիսի 31-ին, երթով Ֆրանսիայի հրապարակից հասան գլխավոր դատախազության շենքի մոտ: Այստեղ երթը կանգ առավ։ ԱԺ «Հայաստան» խմբակցության պատգամավոր Արամ Վարդեւանյանը նշեց. «Սա այն կառույցն է, որը հենց տեսնում է, որ օրինակ, մի բերետավոր՝ տարբեր գույնի ոստիկան, մի քաղաքացու ձեռք է ջարդում, մեկի ոտքն է ջարդում, մեկի մազերն է քաշում, մեկին խեղդում է, այդ ժամանակ այս կառույցը պետք է գործ հարուցի: Իր պարտականությունը դա  է: Հիմա ես հարց եմ ուզում բարձրացնել, գործ հարուցե՞լ է այս կառույցը, թե՞ ոչ:

Դրանից հետո երթը մի քիչ առաջ շարժվեց՝ հասնելով ԱԳՆ շենքին, որի մուտքին մեծ թվով ոստիկաններ են կանգնած՝ վահաններով ու սաղավարտներով:

ԱԺ փոխխոսնակ, «Հայաստան» խմբակցության պատգամավոր Իշխան Սաղաթելյանը կոչ արեց ոստիկանների հետ կոնֆլիկտի չբռնվել. «Մենք այստեղ ենք մի նպատակով, որ մեր պատգամավորները հանդիպեն նախարարների հետ, հասկանան նրանց դիրքորոշումը մեր հրապարակած սկզբունքների վերաբերյալ: Մոտենում ենք առաջ, բայց շենքը չենք շրջափակում»:

Շուրջ երեք տասնյակ ընդդիմադիր պատգամավորներ ցանկություն հայտնեցին հանդիպելու երեք նախարարների հետ: Ոստիկանության ներկայացուցիչն ասաց, որ կտեղեկացնեն նախարարներին: