Ընտրություն կատարելիս պետք է առաջնորդվենք սկզբունքով, թե ինչպիսի Հայաստան ենք ուզում տեսնել. Սուրեն Սահակյան

Աջափնյակի 6/17 ընտրատեղամասում իր քվեարկությունը կատարեց «Քաղաքացու որոշում» սոցիալ-դեմոկրատական կուսակցության առաջին համար Սուրեն Սահակյանը: Նա քվեարկությանը գնացել էր կնոջ և դստեր հետ:

Սահակյանն ակնկալում է, որ այս ընտրությունները կանցնեն արդար, թափանցիկ և գիտակցված։ «Կարևոր է ոչ միայն որևէ քաղաքական ուժի հաղթանակը, այլև այն, որ ՀՀ քաղաքացիները կարողանում են ընտրություն կատարել և դրանով իրենց ազատ կամքը դրսևորել»,- նշեց նա:

Սահակյանի խոսքով` իրենց` խորհրդարանում չհայտնվելու հավանականությունը շատ փոքր է:

Հարցին` ընտրախախտումի ականատես եղե՞լ է, նա պատասխանեց` ոչ, ու պատմեց մի դեպք: «Ես հենց նոր քվեարկում էի, մեր հարևանն ասաց` գաղափարական առումով կքվեարկեր իմ օգտին, բայց պարտավոր է  քվեարկել իր աղջկա եսիմ ինչ բաջանաղի օգտին: Ես ուզում եմ ասել, որ այսպիսի քվեակարգով մենք հեռու չենք գնա, և առաջնահերթ կարիք եմ տեսնում Ընտրական օրենսգրքի և կուսակցությունների մասին օրենքի փոփոխության, որպեսզի մենք ընտրություն կատարելիս առաջնորդվենք բացառապես նրանով, թե ինչ Հայաստան ենք ուզում տեսնել»,- ասաց թեկնածուն: