Հեռախոսիս 3G-ն անջատված չի եղել. Նաղդալյանը` հեռախոսով 2 մլն դրամի չափ խոսելու մասին

Մամուլում տեղեկություններ էին տարածվել, որ ՀՀԿ-ական պատգամավոր Հերմինե Նաղդալյանը մեկ ամսում 2 մլն դրամի չափով խոսել է հեռախոսով, որը ԱԺ-ն հատուցել է պետական բյուջեի հաշվին:

Նշենք, որ ԱԺ փոխնախագահները եւ հանձնաժողովի նախագահները գործուղման մեկնելիս պետության կողմից նախապես ստանում են ռոումինգ կապով հեռախոսահամարներ:

Խորհրդարանում լրագրողները Նաղդալյանից փորձեցին մեկնաբանություն ստանալ այդ կապակցությամբ:

«Ի՞նչը մեկնաբանեմ: Հեռախոսս տեխնիկական խնդիրներ ուներ, 3G-ն անջատված չի եղել, դրա համար է այդպես եղել»,- ասաց նա:

Հարցին` գուցե Չինաստա՞ն է խոսել` որդու հետ, պատգամավորը պատասխանեց. «Որդուս հետ վոթսափով եմ խոսել»:

«Արդյո՞ք պատրաստվում է փոխհատուցել» հարցին էլ պատասխանեց, որ իրենից փոխհատուցում չեն ուզել:

Հարցին` մեկ ամիս շարունակ խնդիրներ է ունեցել հեռախոսը, չի՞ իմացել, Նաղդալյանն արձագանքեց. «Մեկ ամիս շարունակ չէ, մի քանի օր»: