Փորձել են ահաբեկել իրավապաշտպաններին

Հուլիսի 6-ի վաղ առավոտյան անհայտ անձինք, մետաղյա ճաղերի արանքից կոտրելով Ա.Սախարովի անվան Մարդու իրավունքների պաշտպանության հայաստանյան կենտրոնի Շիրակի մասնաճյուղի Գյումրու գրասենյակի պատուհանի ապակին, հեղուկ վառելանյութով հրկիզել են պատուհանն ու պատուհանագոգը:

Ինչպես տեղեկացնում է «Շիրակ կենտրոն» ՀԿ-ն, գրասենյակի հարեւանությամբ ապրողները զանգահարել են հրշեջ ծառայություն, նաեւ մինչ հրշեջների գալը փորձել են ինքնուրույն հանգցնել կրակը:

Գրասենյակին էական վնաս է հասցվել:

Այդ կապակցությամբ Գյումրիի մի շարք հասարակական կազմակերպություններ հանդես են եկել հայտարարությամբ, որում դատապարտում են մարդու իրավունքների պաշտպանությամբ զբաղվող հասարակական կազմակերպությանը եւ իրավապաշտպաններին ահաբեկելու հերթական փորձը: