Նախազգուշական միջոցառում

Վերջին շրջանում լուրեր են շրջանառվում Կադաստրի պետական կոմիտեի նախագահ Երվանդ Զախարյանի մոտալուտ պաշտոնանկության և այդ պաշտոնում Երևանի նախկին քաղաքապետ Գագիկ Բեգլարյանի նշանակման մասին:

Խոսակցությունների տարածմանը նպաստում են նաև երկրի նախագահի և վարչապետի` կադաստրի համակարգում տեղ գտած բացթողումների և չարաշահումների մասին հայտարարությունները: Մասնավորապես` նախորդ շաբաթ` կառավարության նիստի ժամանակ, նման մի հայտարարությամբ հանդես եկավ վարչապետ Տիգրան Սարգսյանը՝ ռիսկային համակարգերի շարքում նշելով նաև Կադաստրի պետական կոմիտեն:

Մեր ունեցած տեղեկություններով` կոմիտեի նախագահ Զախարյանը շտապ խորհրդակցության է հրավիրել ապարատի, ինչպես նաև տարածքային ստորաբաժանումների ղեկավարներին և զգուշացրել, որ կտրականապես արգելում է համակարգում գումարների ապօրինի շրջանառությունը:

Այն տարածքային ծառայության պետերը, որոնց ենթակաները կհամարձակվեն ապօրինաբար գումար պահանջել ծառայությունների դիմաց, անհապաղ կհեռացվեն աշխատանքից: