Լևոն Արոնյանը հաղթեց Հիկարու Նակամուրային առաջին մրցամարտում. Airthings Masters

Առցանց անցկացվող արագ շախմատի մրցաշարում այսօր կայացան քառորդ եզրափակչի առաջին հանդիպումները:

Հայաստանի ուժեղագույն շախմատիստ Լևոն Արոնյանը 2,5:1,5 հաշվով հաղթեց ամերիկացի գրոսմայստեր Հիկարու Նակամուրային: Առաջին, երրորդ և չորրորդ պարտիաներում կողմերը հաշտություն կնքեցին, իսկ երկրորդում հաղթանակ տարավ հայ շախմատիստը:

Վաղը կկայանան այս փուլի մնացած 4 պարտիաները: Կիսաեզրափակիչ փուլ մտնելու համար Լևոն Արնոյանին հարկավոր է չպարտվել այդ մրցամարտում, հակառակ դեպքում զույգի հաղթողը կորոշվի թայ-բրեյքում:

Այսօր կայացած մյուս հանդիպումներում հաղթանակ տարավ նաև ֆրանսիացի Մաքսիմ Վաշյե-Լագրավը, որը 3:1 հաշվով պարտության մատնեց ամերիկացի Վեսլի Սոյին: Մագնուս Կառլսեն – Դանիլ Դուբով և Յան Նեպոմնյաշչի – Թեյմուր Ռաջաբով մրցախաղերն ավարտվեցին ոչ-ոքի՝ 2:2: