Փշալարեր՝ Խարբերդի Սուրբ Գևորգ վանքի շուրջ

Խարբերդում գտնվող Սուրբ Գևորգ հայկական վանքը վերջնական ավերումից փրկելու նպատակով փշալարեր են անցկացվել կառույցի շուրջ։

Այս մասին, www.akunq.net- ի փոխանցմամբ, հաղորդում են թուրքական լրատվամիջոցները։

Ըստ աղբյուրի՝ Խարբերդի Հոլվենք գյուղում գտնվող Սուրբ Գևորգ վանքը, որը կառուցվել է 6-րդ դարում, թողնվել է ճակատագրի քմահաճույքին։ Հայոց ցեղասպանությունից առաջ մեծ վանական համալիր եղած Սուրբ Գևորգը 1915 թվականից հետո դարձել է այստեղ բերված գաղթականների բնակատեղի։

Երիտթուրքական Միություն և առաջադիմություն կուսակցության ժամանակաշրջանում վանքը հատկացվել է Բաղեշից Խարբերդ բերված համիդիյե գնդի զինվորներից Սադըք Էրզենին և ժամանակի ընթացքում սկսել է ավիրվել։ Վանքը նախ բազմիցս ավերումների է ենթարկվել զորագնդի անդամների կողմից, որոնք գանձեր են որոնել այնտեղ։

Հետագայում ևս գանձագողերի թիրախը դարձած այս սրբավայրից գրեթե ոչինչ չի մնացել։  Միակ բանը, որ մնացել է վանական համալիրից, քանդուքարափ պատերն ու ճաքեր տված սյուներն են։ Վանքի տարածքն օգտագործվել է զբոսախնջույքներ կազմակերպողների կողմից, ովքեր լրջորեն կեղտոտել են այն։ Բացի այդ, կտրատվել է վանքի շուրջ գտնվող թթենիների մի մասը։

Ի վերջո, տեղական իշխանությունները որոշել են փշալարեր անցկացնել վանական համալիրի շուրջ՝ նրա ավերակները պահպանելու նպատակով։

Թուրքերենից թարգմանեց Մելինե Անումյանը