Հանդիպում` Թուրքիայի ԱԳՆ-ում

Թուրքիայի արտգործնախարար Ահմեդ Դավութօղլուն ընդունել է Թուրքիայում այցով գտնվող` Հայ Առաքելական եկեղեցու Ամերիկայի արեւելյան թեմի առաջնորդ Գերաշնորհ Տեր Խաժակ արքեպիսկոպոս Պարսամյանին:

Արքեպիսկոպոսը հանդիպել է նաեւ Թուրքիայի կրոնական հարցերով վարչության պետ, պրոֆեսոր Մեհմեթ Գյորմեզի հետ: Թուրքական ԶԼՄ-ները հայտնում են, որ հանդիպումն անցել է դրական մթնոլորտում:

Իսկ Դավութօղլու-Պարսամյան հանդիպման մանրամասների մասին տեղեկություններ չկան, ընդամենը նշվում է, որ հայ հոգեւորականը Թուրքիա է ժամանել` մասնակցելու Ստամբուլի համալսարանի եւ Թուրքիայի ապագայի հետազոտությունների հիմնադրամի կողմից կազմակերպված առաջնորդների համաժողովին:

Համաժողովի նպատակն է աջակցել Թուրքիային միջազգային հարաբերություններում կարեւոր դերակատար դառնալու գործում: Միջոցառմանը մասնակցելու համար Ստամբուլ են ժամանել քաղաքական եւ տնտեսական գործիչներ, մտավորականներ: