«Տաշիր»-ի երևանյան գրասենյակից իրավապահները համակարգիչներ ու փաստաթղթեր են առգրավել

«Տաշիր գրուպի» գլխավոր գրասենյակում մոտ 6 ժամ տևած քննչական գործողություններն ավարտվել են, իրավապահները առգրավել են համակարգիչներ և փաստաթղթեր։ Այս մասին լրագրողներին հայտնեց փաստաբան Արմեն Ֆերոյանը։

«Իրականացվել է խուզարկություն, որի հետ մենք ունենք անհամաձայնություն։ Մեզ տրամադրվել է դատարանի որոշում, և մենք բողոքարկելու ենք, քանի որ գտնում ենք, որ այս գործընթացն ապօրինի է», - ասաց Ֆերոյանը։

Փաստաբանը, արձագանքելով դիտարկմանը, թե Քննչական կոմիտեի տարածած հայտարարության համաձայն՝ խուզարկություն իրականացվել է հարկեր թաքցնելու կասկածանքով, հայտարարեց՝ նման բան գոյություն չունի։

«Մենք գտնում ենք, սա ապօրինությունների շղթայի մասն է, որը կանխատեսում ենք, որ կշարունակվի»,– հավելեց Արմեն Ֆերոյանը։