G7-ի երկրները պայմանավորվել են ձմռանը մեծացնել Ուկրաինային հատկացվելիք ֆինանսական աջակցությունը

G7-ի երկրների արտաքին գործերի նախարարները պայմանավորվել են ձմեռային շրջանում ընդլայնել Ուկրաինայի ֆինանսական աջակցությունը։ «Արմենպրես»-ի հաղորդմամբ՝ այս մասին նշված է Փարիզում նրանց մասնակցությամբ կայացած հանդիպման արդյունքներով հրապարակված հաղորդագրությունում։

«Վերահաստատեցինք Ուկրաինայի էներգետիկ անվտանգությանն աջակցելու մեր հանձնառությունը՝ որոշելով ակտիվացնել մեր ֆինանսական և նյութական աջակցությունը, որպեսզի օգնենք այս երկրին հաղթահարելու ձմեռը»,- նշված է Մեծ Բրիտանիայի արտաքին գործերի նախարարության հրապարակած հայտարարությունում։

Նշվում է, որ G7-ի երկրների արտաքին գերատեսչությունների ղեկավարներն ընդունել են Ուկրաինայի անհապաղ ֆինանսական կարիքներին առնչվող հարցերը 2027 թվականին և դրանից հետո համակարգված լուծելու անհրաժեշտությունը։