Ադրբեջանի խորհրդարանը որոշել է կասեցնել հարաբերությունները Եվրախորհրդարանի հետ

Ադրբեջանի խորհրդարանը՝ Միլի Մեջլիսն ընդունել է Եվրախորհրդարանի «հակաադրբեջանական» գործունեության վերաբերյալ բանաձև։ Ըստ ԱՊԱ-ի, փաստաթուղթը կարդացել է փոխխոսնակ Զիյաֆաթ Ասգարովը։

Որոշման համաձայն՝ Միլի Մեջլիսը կասեցնում է Եվրոպական խորհրդարանի հետ ցանկացած համագործակցություն։ Կսկսվի նաև Միլի Մեջլիսի Եվրոնեստ խորհրդարանական վեհաժողովին անդամակցությունը դադարեցնելու ընթացակարգը։

Հիշեցնենք՝ ՀՅԴ Հայ դատի Եվրոպայի գրասենյակը ողջունում է Եվրոպական խորհրդարանի բանաձևը, որով պահանջվում է, որ Հայաստանի իշխանությունները երաշխավորեն ընդդիմության իրավունքների լիարժեք հարգումը, դատական անկախությունը և խոսքի ազատությունը։

Բանաձևը անդրադառնում է ԵՄ–Հայաստան հարաբերությունների նոր փուլին, որը բնութագրվում է անվտանգային համագործակցության ընդլայնմամբ և ժողովրդավարության ու իրավունքի գերակայության նկատմամբ ընդհանուր հանձնառությամբ։ Այն ծառայում է որպես համապարփակ ճանապարհային քարտեզ ԵՄ–Հայաստան գործընկերության համար՝ ընդգրկելով նոր ռազմավարական օրակարգի իրականացումը, դիմակայունթյան և աճի ծրագիրը, ինչպես նաև Հայաստանի պաշտոնական ձգտումը դեպի ԵՄ անդամակցություն։

Հայ դատի Եվրոպայի գրասենյակը հատկապես ընդգծում է խորհրդարանի դիրքորոշումը «ընդդիմության իրավունքների լիարժեք հարգման» և բոլոր քաղաքական դերակատարների համար հավասար պայմանների անհրաժեշտության վերաբերյալ։ Մենք արձագանքում ենք նաև արտաքին միջամտության և հիբրիդային սպառնալիքների դեմ ամուր պաշտպանական մեխանիզմների կոչին, մասնավորապես այն սպառնալիքների, որոնք ուղղված են Հայաստանի ժողովրդավարական ինստիտուտների ապակայունացմանը։

Բանաձևը անդրադառնում է արդարության և անվտանգության այն առանցքային դրույթներին, որոնք էական են տարածաշրջանում կայուն խաղաղության համար։