Եվրախորհրդարանի պատգամավորները պահանջում են կասեցնել Վրաստանի՝ Եվրամիության թեկնածուի կարգավիճակը

Եվրախորհրդարանի 31 անդամներ դիմել են ԵՄ արտաքին քաղաքականության դեպարտամենտի ղեկավար Ժոզեպ Բորելին՝ խնդրելով չեղարկել Վրաստանի ԵՄ-ի թեկնածուի կարգավիճակը և վերանայել Վրաստանին տրամադրվող ֆինանսական օգնությունը։

Եվրախորհրդարանի անդամները գրում են, որ «Վրաստանի իշխանությունների ոչ ժողովրդավարական պահվածքի շարունակությունը, հատկապես նրանց ագրեսիվությունը օտարերկրյա գործակալների մասին «ռուսական ոճով» օրենքի ընդունման և խաղաղ ցուցարարների նկատմամբ ուժի կիրառման հարցում հատել է բոլոր սահմանները։

Ըստ վրացական լրատվամիջոցների՝ Եվրախորհրդարանի պատգամավորները նաև ասում են, որ այս պահվածքը «ավելացրել է լարվածությունը և բևեռացումը վրացական քաղաքականության և հասարակության մեջ» և նշում են, որ «ԵՄ-ն այլևս չի կարող անտեսել դա»: