կարևոր
5152 դիտում, 11 ամիս առաջ - 2023-03-24 21:06
Հասարակություն

Երեւանի քաղաքապետարանը սակուրայի մեկ տնկին ձեռք է բերել 65-72 հազար դրամով. «Հետք»

Երեւանի քաղաքապետարանը սակուրայի մեկ տնկին ձեռք է բերել 65-72 հազար դրամով. «Հետք»

Մարտի 23-ին Երեւանի քաղաքապետարանի «Կանաչապատում եւ շրջակա միջավայրի պահպանություն» ՀՈԱԿ-ը հայտարարեց «ծերացած, ֆունկցիոնալության ավարտին մոտ ծառերը կենսունակ, գեղազարդ ծառերով փոխարինելու աշխատանքների» մեկնարկի մասին։ Աշխատանքները մեկնարկել են Կասկադից, եւ այնտեղ հաստաբուն ծառերի հատումը քաղաքացիների շրջանում բողոքի ալիք բարձրացրեց։

«Կանաչապատում եւ շրջակա միջավայրի պահպանություն» ՀՈԱԿ-ը Կասկադում հատված ծառերի փոխարեն տնկելու է սակուրա տեսակի ծառեր։ «Հետքը» պարզել է, թե քաղաքապետարանը որ ընկերությունից եւ որքան գումարով է ձեռք բերել այդ ծառատեսակի տնկիները։

Պետական գնումների armeps.am համակարգի տվյալներով՝ 2023 թվականի փետրվարի 14-ին ՀՈԱԿ-ը գնման պայմանագիր է կնքել «Կանաչ հեքիաթ» ՍՊԸ-ի հետ։ Ընկերությունը պարտավորվել է այդ գումարի դիմաց մատակարարել ընդհանուր 150 հատ սակուրա ծառատեսակի տնկի։

Ըստ պայմանագրի հավելվածի՝ ՀՈԱԿ-ը ձեռք է բերել 100 հատ «սակուրա ճապոնական ռոյալ բուրգունդի» տեսակի տնկի՝ մեկ հատը 72 490 դրամով, 30 հատ «սակուրա ճապոնական սերուի աթա ամանոգավա» տնկի՝ մեկ հատը 62 490 դրամով, 20 հատ «սակուրա ճապոնական սերիուաթա կիկու շիդարու» տեսակի տնկի՝ մեկ հատը 65 490 դրամով։

Այսինքն՝ Երեւանի քաղաքապետարանը 150 սակուրայի համար պետք է վճարեր 10 մլն 433 հազ․ 500 դրամ։ Սակայն փետրվարի 27-ին ՀՈԱԿ-ի եւ «Կանաչ հեքիաթ» ՍՊԸ-ի միջեւ կնքվել է համաձայնագիր, որով 150-ի փոխարեն մատակարարվելու է 70 սակուրա․ 50 հատ՝ յուրաքանչյուրը 72 490 դրամով եւ 20 հատ՝ յուրաքանչյուրը 65 490 դրամով։ Պայմանագրի ընդհանուր արժեքը կազմել է 4 մլն 934 հազ․ դրամ։

Իրավաբանական անձանց ռեգիստրի տյալներով՝ «Կանաչ հեքիաթ» ՍՊԸ-ն 2012 թվականի փետրվարին հիմնադրել է Բալաբեկ Քոչարյանը՝ Կոտայքի մարզի Նոր գյուղ բնակավայրում։ 2021 թվականից ընկերությունը ղեկավարում է նրա եղբայրը՝ Նարեկ Քոչարյանը։

«Հետքի» հետ զրույցում «Կանաչապատում եւ շրջակա միջավայրի պահպանություն» ՀՈԱԿ-ի տնօրեն Արմեն Բեգոյանը նշեց, որ ձեռք բերված սակուրաներից 46-ը տնկվել են Կասկադում, իսկ մնացածը տնկվելու են Երեւանի հանրային զբոսայգիներում՝ ծաղկային շերտը ավելացնելու նպատակով։

Ընդհանուր առմամբ, ըստ Արմեն Բեգոյանի՝ նախատեսվում է «ֆունկցիոնալության ավարտին մոտ ծառերը կենսունակ ծառերով փոխարինելու աշխատանքների» շրջանակում տնկել 2500 ծառ։