Ռուսաստանը հարձակումների նոր ալիք է նախապատրաստում Ուկրաինայում. Ուկրաինայի ՊՆ

Ուկրաինայի պաշտպանության նախարար Ալեքսեյ Ռեզնիկովը հայտարարել է, որ ռուսական զորքերը ուժեր են հավաքում Կիևի, Խարկովի, Չեռնիգովի և Նիկոլաևի վրա հարձակումների նոր ալիքի համար։ Այս մասին նա գրել է Facebook-ում։

Նախարարի խոսքով՝ ռուսական զորքերը փորձում են ուժերն ու միջոցները կենտրոնացնել հարձակումների նոր ալիքի համար։ «Առաջին հերթին՝ Կիևի, Խարկովի, Չեռնիգովի և Նիկոլաևի համար։ Մենք չենք կորցնում զգոնությունը։ Ռուսական զորքերը ամենուր կոշտ հակահարված կստանան»,- ընդգծել է Ռեզնիկովը։

Նա նաև նշել է, որ ռուսական բանակը հումանիտար ճգնաժամով փորձում է խեղդել Մարիուպոլ քաղաքը։

Նա վստահեցրել է, որ ուկրաինական զորքերը կվերականգնեն իրենց վերահսկողությունը կորցրած քաղաքների և գյուղերի նկատմամբ. «Խերսոնը, Կախովկան, Մելիտոպոլը, Բերդյանսկը և Գենիչեսկը ցույց են տվել, որ ավելի լավ է, որ թշնամին հեռանա, քանի դեռ ուշ չէ»։