Բալահովիտում կրակոցների գործով ձերբակալվել է երրորդ երիտասարդը

Ոստիկանության ծառայողների ձեռնարկած միջոցառումների արդյունքում այսօր հայտնաբերվել և ձերբակալվել է Վարդան Հարությունյանը: Ավելի վաղ ձերբակալվել էին Էդվին Թադևոսյանը և Մաթևոս Կարապետյանը:

Հիշեցնենք, որ ոստիկանության քրեական հետախուզության գլխավոր, Կոտայքի մարզային վարչությունների և Կոտայքի բաժնի ծառայողների ձեռնարկած միջոցառումների արդյունքում պարզվել էր, որ մայիսի 22-ին Բալահովիտ գյուղի 1-ին փողոցի հարակից բենզալցակայանի մոտ 1985 թ. ծնված Մաթևոս Կարապետյանը, 1986 թ. ծնված Էդվին Թադևոսյանը և 1980 թ. ծնված Վարդան Հարությունյանը կենցաղային հարցերի շուրջ վիճաբանել են միմյանց հետ, ինչի ընթացքում Էդվին Թադևոսյանն իր մոտ պահվող ատրճանակից 3-4 կրակոց է արձակել:

Փաստի առթիվ հարուցվել է քրեական գործ ՀՀ քրեական օրենսգրքի 258 հոդվածի 4-րդ մասի և 235 հոդվածի 1-ին մասի հատկանիշներով: Կատարվում է նախաքննություն: