ՏԵՍԱՆՅՈՒԹ. Այդ պահին գյուղում հարսանիք է եղել, կրակոցների թիրախը խաղաղ բնակչությունն է եղել. Կոթիի գյուղապետը՝ գիշերվա կրակոցների մասին

Ադրբեջանի կողմից Տավուշի ուղղությամբ կրակոցները դադարել են ՀՀ ԶՈւ պատասխան կրակից հետո միայն:

Տուժածներ չկան՝ Yerkir.am-ի հետ հեռախոսազրույցում ասաց Կոթիի գյուղապետ Ֆելիքս Մելիքյանն ու հավաստիացրեց՝ այս պահին գյուղում ամեն ինչ խաղաղ է՝ երեխաները դպրոց, մանկապարտեզ են հաճախում:

Ճշտվում է նյութական վնասի չափը:

"Գյուղի և դիրքերի ուղղությամբ ինտենսիվ կրակոցներ են եղել: Այդ պահին Կոթիիում հարսանիք է եղել, որը ոչ մի րոպե չի դադարել մարդիկ երգել են, պարել, ուրախացել։ Կրակոցները թիրախավորված էին՝ խաղաղ բնակչությունն էր թիրախում։ Բարեբախտաբար որևէ տուժած չկա",-հավաստիացրեց Ֆելիքս Մելիքյանը։

Ավելի վաղ Yerkir.am-ը  հայտնել էր, որ երեկ կեսգիշերին մոտ Ադրբեջանական ԶՈւ-երը շարունակել են կրակել Տավուշի մարզի Իջևան-Նոյեմբերյան մայրուղու և Կոթի գյուղի ուղղությամբ։ Ադրբեջանական կողմից կիրառվել են տարբեր տրամաչափի հրաձգային զենքեր, գնդացիրներ: