Վրաստանի Պատրիարքարանը արձագանքել է Ադրբեջանում գտնվող Քուրմուխիի վրացական եկեղեցում իրականացվող աշխատանքներին

«Vector News»-ը գրում է, որ Վրաստանի Պատրիարքարանը հայտարարություն է տարածել՝ կապված Քուրմուխիի Սուրբ Գևորգ եկեղեցում իրականացվող աշխատանքների հետ, որը գտնվում է ժամանակակից Ադրբեջանի տարածքում։
Պատրիարքարանում մտահոգիչ են անվանել վերջին օրերին լրատվամիջոցներում տարածված լուսանկարներն ու տեսանյութերը, որոնք վերաբերում են ինչպես բուն եկեղեցում, այնպես էլ հարակից տարածքում իրականացվող աշխատանքներին։
«Թեև Քուրմուխիի եկեղեցին այսօր գտնվում է Ադրբեջանի Հանրապետության տարածքում, այն մեր երկրի և Եկեղեցու պատմական ու հոգևոր ժառանգության կարևորագույն հուշարձաններից մեկն է», — ասվում է հայտարարության մեջ։
Պատրիարքարանը նշում է, որ առանձնահատուկ ուշադրության է արժանի ցանկացած միջամտություն ինչպես բուն եկեղեցում, այնպես էլ դրա հարակից տարածքում։ Եկեղեցու հայտարարության համաձայն՝ հարցեր են առաջանում ինչպես իրականացվող աշխատանքների անհստակ նպատակների, այնպես էլ վրացական մշակութային ժառանգության հուշարձանի՝ վրացական կողմի հետ չհամաձայնեցված վերականգնման կապակցությամբ։
Բացի այդ, Պատրիարքարանը հայտարարել է, որ Ադրբեջանի համապատասխան պետական մարմիններից որևէ տեղեկություն չի ստացել իրականացվող աշխատանքների վերաբերյալ։
Այս կապակցությամբ Պատրիարքարանը կարևոր է համարում պարզել, թե ինչ բնույթի աշխատանքներ են իրականացվում եկեղեցու տարածքում, ինչ հետազոտությունների վրա են դրանք հիմնված, ով է իրականացնում աշխատանքները և ինչպես է ապահովվում վրացական մշակութային ժառանգության հուշարձանի պահպանումը։
Պատրիարքարանը նաև կոչ է արել Վրաստանի համապատասխան պետական գերատեսչություններին անհապաղ ներգրավվել գործընթացում, ստանալ պաշտոնական տեղեկություն և նպաստել հարցի քննարկմանը Վրաստանի Պատրիարքարանի ներկայացուցիչների և վրացի մասնագետների մասնակցությանը։
«Միայն ժամանակին և համակարգված համագործակցության միջոցով է հնարավոր ապահովել վրացական հոգևոր և մշակութային ժառանգության հուշարձանի պատշաճ պաշտպանությունն ու պահպանումը», - ասվում է հայտարարության մեջ։

Ավելի վաղ «Vector News»-ը արդեն գրել էր Քուրմուխիի Սուրբ Գևորգ եկեղեցու տարածքում իրականացվող աշխատանքների մասին։