Ռուսաստանի ՀՕՊ-ը գիշերը 147 ուկրաինական անօդաչու է ոչնչացրել. ՌԴ ՊՆ

Ռուսաստանի ՀՕՊ համակարգերը երկուշաբթի երեկոյից սկսած ՌԴ մարզերի երկնքում 198 ուկրաինական անօդաչու են ոչնչացրել։ Այս մասին հայտնում է ՌԴ ՊՆ–ն։

«Հունիսի 16-ի ժամը 23:30-ից մինչև հունիսի 17-ի ժամը 07:00-ն (Մոսկվայի ժամանակով) ընկած ժամանակահատվածում ՀՕՊ հերթապահ միջոցները որսացել և ոչնչացրել են 147 ուկրաինական ինքնաթիռատիպ անօդաչու Բելգորոդի, Կուրսկի, Բրյանսկի, Վորոնեժի, Տվերի, Լիպեցկի, Օրյոլի, Տամբովի, Տուլայի մարզերի և Մոսկվայի մարզի տարածքների վրա։ Ընդհանուր առմամբ, հունիսի 16-ի ժամը 20:00-ից մինչև հունիսի 17-ի ժամը 07:00-ն ՀՕՊ–ը որսացել և ոչնչացրել է 198 ուկրաինական ինքնաթիռատիպ անօդաչու թռչող սարք», – ասվում է հաղորդագրության մեջ։

Հիշեցնենք՝ 2022 թվականի փետրվարի 24-ին սկսվեց Ռուսաստանի և Ուկրաինայի միջև զինված հակամարտություն՝ Ռուսաստանի զինված ուժերի կողմից Ուկրաինայի տարածք ներխուժմամբ։ Մոսկվայի ժամանակով մոտավորապես ժամը 05:30-ին Ռուսաստանի նախագահ Վլադիմիր Պուտինը հայտարարեց Ուկրաինայի «ապառազմականացման և դենացիֆիկացման հատուկ գործողության» մասին, որից րոպեներ անց հրթիռային հարվածներ սկսվեցին Ուկրաինայի տարբեր վայրերում։ Մարտական գործողություններն ընթանում են մինչ օրս։