Իրանը հույս ունի, որ ԱՄՆ-ն լուրջ մոտեցում կցուցաբերի միջուկային հարցի վերաբերյալ. Բաղայի

Իրանական կողմը հույս ունի, որ ԱՄՆ-ն լուրջ մոտեցում կցուցաբերի միջուկային հարցի վերաբերյալ պատասխան առաջարկների քննարկմանը։ Այս մասին հայտարարել է Իրանի ԱԳՆ պաշտոնական ներկայացուցիչ Իսմայիլ Բաղային։

«Մենք մեր պատասխան առաջարկը ԱՄՆ-ին կներկայացնենք Օմանի միջոցով, հենց որ այն վերջնականապես կազմված լինի։ Անկասկած, Միացյալ Նահանգների շահերից է բխում լուրջ դիտարկել այդ առաջարկը», - ասել է Բաղային։

Նա նաև նշել է, որ ամերիկյան կողմի առաջարկը որևէ կոնկրետ բովանդակություն չուներ և փաստացի չէր արտացոլում բանակցությունների վերջին հինգ փուլերը։

Ավելի վաղ Իրանի ԱԳ նախարար Աբբաս Արաղչին հայտարարել էր, որ Թեհրանն ԱՄՆ-ի հետ գործարքի չի գնա առանց ուրանի հարստացման իրավունքի պահպանման: Նա ընդգծել էր, որ Իրանը շատ բան է զոհաբերել իր ատոմային ծրագրի զարգացման համար: