Թուրքիայի իշխող կուսակցության անդամը հայտարարել է, որ Դամասկոսը չի ընդունել Անկարայի խնդրանքը՝ Ասադի ու Էրդողանի հանդիպման վերաբերյալ

Թուրքիայի իշխող «Արդարություն և զարգացում» կուսակցության պատգամավոր Օրհան Միրիօղլուն ասել է, որ Դամասկոսը չի ընդունել Անկարայի խնդրանքը՝ Բաշար ալ-Ասադի և Ռեջեփ Թայիփ Էրդողանի հանդիպման վերաբերյալ։

Սիրիայում որոշել են հետաձգել Էրդողանի ու Ասադի հանդիպումը մինչև Թուրքիայում կայանալիք ընտրությունները։

Ավելի վաղ Թուրքիան արդեն հայտարարել էր, որ Թուրքիայի և Սիրիայի նախագահներ Ռեջեփ Թայիփ Էրդողանի և Բաշար ալ-Ասադի հանդիպումը դժվար թե կայանա մինչև 2023 թվականի հունիսին Թուրքիայում կայանալիք նախագահական ընտրությունները։ Այս մասին A-Haber հեռուստաալիքի եթերում հայտարարել է Թուրքիայի ղեկավարի պաշտոնական ներկայացուցիչ Իբրահիմ Քալընը։

«Պայմանները պետք է հասունանան այս հանդիպման համար: Չեմ կարծում, որ այն տեղի կունենա նախագահական ընտրություններից առաջ»,- ասել է Քալընը:

Միաժամանակ նա հավելել է, որ Թուրքիան շարունակում է Սիրիայի հետ շփումները հատուկ ծառայությունների մակարդակով։ «Մենք նման շփումներ ենք պահպանում, դրանք անհրաժեշտ են»,- ասել է Էրդողանի խոսնակը։

Նշենք, որ սիրիական իշխանություններն ավելի վաղ հայտարարել էին, որ Էրդողանը ցանկանում է Ասադի հետ հանդիպել 2023 թ. ընտրություններից առաջ բարի համբավ ձեռք բերելու նպատակով: