Բայդենը հայտարարել է Ռուսաստանի դեմ նոր պատժամիջոցների մասին

ԱՄՆ նախագահ Ջո Բայդենը հայտարարել է Ռուսաստանի դեմ նոր պատժամիջոցների մասին՝ կապված Մոսկվայի կողմից Դոնեցկի և Լուգանսկի ճանաչման հետ: Նա Ուկրաինայի դեմ Ռուսաստանի գործողություններն անվանել է «ներխուժման սկիզբ»։

Սահմանափակիչ միջոցները կազդեն ռուսական էլիտաների, ՎԷԲ պետական կորպորացիայի և Ռուսաստանի ինքնիշխան պարտքի վրա։

«Մենք լրիվ արգելափակող պատժամիջոցներ ենք կիրառում ռուսական երկու խոշոր ֆինանսական հաստատությունների՝ ՎԷԲ-ի և նրանց ռազմական բանկի նկատմամբ: Մենք պատժամիջոցներ ենք սահմանել Ռուսաստանի ինքնիշխան պարտքի նկատմամբ: Սա նշանակում է, որ մենք կտրել ենք Ռուսաստանի կառավարությանը արևմտյան ֆինանսավորումից: Այն այլևս չի կարող փող ներգրավել Արևմուտքից և չի կարող ապահովել իր պարտքը ո՛չ մեր, ո՛չ եվրոպական շուկաներում»,- ասել է Բայդենը՝ հավելելով, որ չորեքշաբթի օրվանից Վաշինգտոնը պատժամիջոցներ է կիրառում ռուսական էլիտաների և նրանց ընտանիքների դեմ։

Սպիտակ տան ղեկավարը զգուշացրել է, որ Ռուսաստանը «շատ թանկ» կվճարի իր ագրեսիայի համար։