«Դուք բռնապե՞տ եք». ֆինլանդացի լրագրողի հարցը՝ Էրդողանին

Թուրքիայի նախագահ Ռեջեփ Թայիփ Էրդողանը հյուրընկալել է Ֆինլանդիայի նախագահ Սաուլի Նինիստոյին:

Ըստ Demokrathaber-ի՝ հանդիպումից հետո նախագահները համատեղ ասուլիսով են հանդես եկել, որի ընթացքում երկու երկրների մասին տարբեր հարցեր են հնչել: Ֆինլանդիացի լրագրողներից մեկը, սակայն, անպիսի հարց է ուղղել, որը Թուրքիայի պայմաններում համարվում է «ռիսկային»:

«Դուք բռնապե՞տ եք»,- Էրդողանին հարցրել է լրագրողը՝ հավելելով՝ «ժողովուրդը վախենում է Ձեզանից»:

Էրդողանը, չկորցնելով իրեն, պատասխանել է. «Այն երկրում, ուր բռնապետ կա, կարծում եմ՝ նման հարց չեք կարող տալ: Այն երկրում, ուր բռնապետ կա, վարչապետի, նախագահի կամ նրանց ընտանիքի հասցեին հնչեցված վիրավորանքներ չեք տեսնի: Թուրքիան այն երկիրն է, ուր ազատությունն անսահմանափակ է»:

Ըստ երևույթին, Թուրքիայի ղեկավարը տեղյակ չէ «ազատ արտահայտվելու համար» Թուրքիայում ձերբակալված լրագրողների մասին: