2026-ին կենտրոնանանք իշխանափոխության հասնելու համար ու սառեցնենք ներընդդիմադիր «կրակոցները». Էդուարդ Շարմազանավ

2026-ի առաջնային նպատակը պետք է լինի ոչ թե ընդդիմափոխությունը, այլ՝ իշխանափոխությունը, այս մասին ֆեյսբուքյան իր էջում գրել է ՀՀԿ ԳՄ անդամ, ԱԺ նախկին փոխնախագահ Էդուարդ Շարմազանավը։

«Եթե ուզում ենք հասնել իշխանափոխության՝ անհրաժեշտ է չսրել ու դադարեցնել ներընդդիմադիր հակամարտությունը։

Գլխավոր նպատակին՝ իշխանափոխությանը հասնելու համար անհրաժեշտ է համակարգված պայքար նիկոլիզմի դեմ։ Միայն այս պարագայում է հնարավոր ազատվել նիկոլիզմից։

Բոլորիս ցանկանում եմ, որ 2026-ին կենտրոնանանք իշխանափոխության հասնելու համար ու սառեցնենք ներընդդիմադիր «կրակոցները»։

Աստված պահապան մեր հայրենիքին ու ժողովրդին»,- ընդգծել է Շարմազանովը։

Հիշեցնենք՝ ՀՅԴ Հայաստանի Գերագույն մարմնի ներկայացուցիչ, ԱԺ «Հայաստան» խմբակցության պատգամավոր Իշխան Սաղաթելյանը 26․11․2025 թ-ին կայացած խորհրդարանական լսումների ժամանակ հանդես է եկել ելույթով, որի ժամանակ առաջարկել է ներընդդիմադիր համերաշխություն հետևյալ կետերի շուրջ․

1. օրինական բոլոր միջոցներով հակազդեցության ձևավորում բռնաճնշումների, քաղաքական հետապնդումների և ազատությունների սահմանափակումների նկատմամբ,

2. Հայ Առաքելական եկեղեցու և ազգային արժեքների պաշտպանություն,

3. քաղբանտարկյալների իրավունքների պաշտպանություն՝ որևէ քաղբանտարկյալ բոլորիս քաղբանտարկյալն է սկզբունքով,

4. ընտրական գործընթացի օրինականության ապահովում եւ վերահսկողության իրականացում,

5. միմյանց նկատմամբ հակաքարոզչության բացառում,

6. վարչախմբի հետ ցանկացած (այդ թվում հետընտրական փուլում) համագործակցության բացառում։