Թույլ մի՛ տվեք, որ ձեր երեխաները հեռուստացույցով Էրդողանին դիտեն. դուք էլ մի՛ դիտեք. Դեմիրթաշ

Թուրքիայի քրդամետ Ժողովուրդների դեմոկրատական կուսակցության նախագահ Սելահաթթին Դիմիրթաշը արտահերթ խորհրդարանական ընտրությունների քարոզարշավի շրջանակներում հանրահավաք է կազմակերպել:

Ըստ Demokrathaber-ի՝ Դեմիրթաշն Էրդողանին մեղադրել է երկրում անկայուն իրավիճակ ստեղծելու մեջ: «Էրդողանը ցանկացել է ընտրվել և ժողովուրդի քվեարկությամբ էլ դարձել է նախագահ, սակայն այդքանից հետո, ժողովուրդը դեռ չի ազատվել նրա ձեռքից: Թեկուզ ամեն ամիս ընտրություն նշանակես, մեկ է` մենք յուրաքանչյուր ամիս նրան դաս տալու կարողությունն ունենք»,- ասել է նա:

Դեմիրթաշն անդրադարձել է նաև Էրդողանի ելույթներին և ասել, որ նա ոչ թե խոսում, այլ բղավում է:

«Երեխաները վախենում են, երբ հեռուստացույցով Էրդողանին են տեսնում: Նրան չեն ճանաչում, սակայն վախենում են՝ տեսնելով այդ գոռգոռացող անձին: Փոքրերին թույլ մի\' տվեք, որ դիտեն նրան: Էրդողանը փոքր երեխաների հոգեբանության համար լավ չէ: Որպես չափահասներ՝ դուք ևս մի\' դիտեք, ոչինչ չեք կորցնի: Դուք պարտավոր չեք այդքան վիրավորանք, այդքան սպառնալիք լսել»,- ասել է Դեմիրթաշը: