Ազատամարտիկները շարունակում են բողոքել

Հուլիսի 28-ին Երեւանի Ազատության հրապարակում հանրահավաք էին կազմակերպել ազատամարտիկները, ովքեր ամիսներ շարունակ պայքարում են իրենց իրավունքների պաշտպանության համար: Նրանք կառավարությանը մի շարք պահանջներ են ներկայացրել, ստացել որոշ հարցերի լուծման խոստումներ, սակայն այդպես էլ որեւէ հարց լուծում չի գտել:

Մասնավորաբար` նրանք պահանջում են վերանայել ազատամարտիկների եւ մարտական գործողությունների մասնակիցների սոցիալական երաշխիքները, վերանայել զինծառայողների կենսաթոշակի հաշվարկման կարգը, կատարել վերահաշվարկ եւ փոխհատուցել ազատամարտիկներին ու կենսաթոշակի անցած զինծառայողներին, նաեւ՝ նրանց ընտանիքների անդամներին:

Ազատամարտիկները հանրահավաքում հայտարարեցին, թե սկսում են «երկիրը մաքրելու գործընթացը»։

Ազատամարտիկ Խաչիկ Ավետիսյանը, ով արդեն կես ամիս է, ինչ Ազատության հրապարակում հացադուլ է հայտարարել, ելւույթում ասաց, որ պետք է ազատամարտիկներն ու երիտասարդները միասին որոշեն անելիքները: Հանրահավաքին ներկա էին նաեւ տրանսպորտի թանկացման դեմ ակտիվ պայքարող երիտասարդներ:

Հանրահավաքի ավարտին մասնակիցները երթով շարժվեցին Երեւանի քաղաքապետարան՝ միանալու ընդդեմ քաղաքապետ Տարոն Մարգարյանի՝ քաղաքապետարանի դիմաց նստացույց հայտարարածներին: