Ազատամարտիկները կրկին բողոքելու են

Մայիսի 28-ին Ազատության հրապարակում կրկին հավաքվելու են մի խումբ ազատամարտիկներ՝ որոշելու իրենց հետագա քայլերը:

Այս մասին «Հայկական ժամանակ»-ին է հայտնել ազատամարտիկ Վոլոդյա Ավետիսյանը: Նա նշել է, որ տևական ժամանակ է սպասում են, որ իրենց դիմումին պատասխան տրվի, բայց «էսօր էքուց» են գցում: Ինչպես նշել է ազատամարտիկը, երեկվա դրությամբ պատասխան չկա, մինչդեռ նախօրեին կառավարությունից ասել էին, որ ֆիննախարարությունում քննարկվում է դիմումը և պատասխանը կլինի շուտով:

«Իրենք պետք է ընդունեն մեր պահանջները, հակառակ դեպքում մենք ամեն ձևով պայքարելու ենք»,-ասել է Վոլոդյա Ավետիսյանը և նշել, որ պատրաստ են նույնիսկ ծայրահեղ քայլերի դիմել: Նա հայտնել է, որ եթե իրենց պահանջները կառավարությունը մասնակի բավարարի, ապա չեն դադարեցնելու իրենց պայքարը և պահանջելու են արժանապատիվ կյանքի համար անհրաժեշտ ուշադրություն և գումար: