Ասանժի նախկին գործընկեր ոչնչացրել է Wikileaks-ի գաղտնի փաստաթղթեր

Սկանդալային Wikileaks կայքի հիմնադիր Ջուլիան Ասանժի նախկին գործընկեր` գերմանացի Դանիել Դոմշայթ-Բերգը հայտարարել է, որ նախագծից հեռանալիս ոչնչացրել է ավելի քան 3500 գաղտնի փաստաթղթեր: Ըստ նրա` ինքն այդ բանն արել է, «որպեսզի երաշխավորի այդ տեղեկությունները տրամադրած մարդկանց պաշտպանությունը». տեղեկացնում է Deutsche Welle-ն:

Ոչնչացված փաստաթղթերի մեջ եղել են այն մարդկանց ցուցակները, որոնք վտանգ են ներկայացնում ԱՄՆ-ի համար, բացի այդ` Գերմանիայի աջծայրահեղական Նացիոնալ-դեմոկրատական կուսակցության եւ մոտ 20 նեոնացիստական կազմակերպությունների 6 հազար էլեկտրոնային հաղորդագրություններ: Մոտ 5 գիգաբայթ տեղեկություններ էլ վերաբերել են Bank of America-ին:

Wikileaks-ի ներկայացուցիչները խստորեն դատապարտել են գերմանացու արարքը: WL Central կայքում տեղադրված հայտարարության մեջ նրան մեղադրել են հատուկ ծառայությունների եւ իրավապահների հետ կապերի, նաեւ փաստաթղթեր գողանալու մեջ:

Դանիել Դոմշայթ-Բերգը Wikileaks-ը լքել է 2010-ի սեպտեմբերին: Դրանից հետո նա ստեղծել նմանօրինակ Openleaks ինտերնետային պլատֆորմը` հայտարարելով, որ նյութեր հրապարակելիս առաջնորդվելու են խելամտությամբ: