ՀԱՅԿԱԿԱՆ ԺԱՄԱՆԱԿ. Դուրս են գալիս

Մեր տեղեկություններով` Կենտրոնի նախկին ոստիկանապետ Աշոտ Կարապետյանի` ՀՀ ոստիկանության քրեական հետախուզության գլխավոր վարչւթյան պետ դառնալուց հետո այդ վարչության շատ աշխատակիցներ ազատման դիմումներ են գրել:

Կարապետյանի պաշտոնավարման երկու ամիսների ընթացքում ոստիկանության քրեական հետախուզության կենտրոնական ապարատից արդեն ազատվել են ինը հոգի: Քրեական հետախուզության աշխատակիցների դժգոհությունները կապված են Կարապետյանի գործելաոճի հետ:

Մեր տեղեկություններով` իր նշանակման առաջին օրվանից քրեականի նոր պետը ենթականերից պահանջում է, որպեսզի նրանք մինչեւ ժամը 23:00 անպայման լինեն աշխատանքի վայրում եւ տուն չգնան: Կարապետյանի ենթակաները սկսել են բողոքել` համաձայն չլինելով նման աննորմալ ռեժիմով աշխատել: Սովորաբար, ոստիկանները աշխատանքային ժամի ավարտից հետո աշխատավայրում մնում են միայն հերթապահության օրերին:

ՀՀ ոստիկանության հասարակայնության հետ կապերի վարչությունից մեր թղթակցին խոստացել են այսօր պարզաբանումներ տալ նշված խնդրի վերաբերյալ: