Դիմում եմ զինվորականներին՝ հերթով բոլորիդ փուռն են տալու․ Գեղամ Մանուկյան

«Էդ ինչո՞ւ հանակարծ սկսեցիք տարփողել, որ բանակի, Զինված ուժերի բյուջեն այդքան միլիարդ դրամով կրճատվում է։ Թե՞ այդ ամեն ինչը պետք էր, որ ցույց տայիք, որովհետև դա արտաքին քաղաքական ուղերձ է, այս իշխանության քաղաքական կրեդոյի ուղերձն է, որ մենք «կուճրտելու» ենք, բանակի բյուջեն կրճատում ենք․ ուղերձ՝ ուղղված Բաքվին, Թուրքիային և այլ ոչ բարեկամ երկրներին»,- խորհրդարանում 2026 թվականի բյուջեի նախագծի քննարկումների ժամանակ հայտարարեց «Հայաստան» խմբակցության պատգամավոր Գեղամ Մանուկյանը՝ տարակուսելով, որ հարցեր են հնչել տարբեր ոլորտների, այդ թվում մյուս ուժային կառույցների բյուջեի կրճատումների մասին, մինչդեռ թմկահարվում են միայն ՊՆ-ի բյուջեի կրճատումները։

Անդրադառնալով Նիկոլ Փաշինյանի և Սուրեն Պապիկյանի առաջարկին՝ 50 հոգանոց խմբեր կազմելու վերաբերյալ՝ բանակի սպառազինությանը, դիրքերի կահավորմանը ծանոթանալու համար, Մանուկյանը նշեց․ «Բայց դա դարձնել տուրի՞զմ, երբ որ հարց է առաջանում․ գաղտնիության «դոստուպ» չունեցող մարդը չի կարող գնալ պաշտպանական ամրացված շրջաններ»։