կարևոր
376 դիտում, 27 րոպե առաջ - 2026-11-16 15:29
Աշխարհ

Ռուսաստանն ու Վրաստանը վերսկսում են ուղիղ երկխոսությունը հատուկ ներկայացուցիչների մակարդակով. ՌԴ ԱԳՆ

Ռուսաստանն ու Վրաստանը վերսկսում են ուղիղ երկխոսությունը հատուկ ներկայացուցիչների մակարդակով. ՌԴ ԱԳՆ

Մոսկվան արդեն կապ է հաստատել Ռուսաստանի հետ հարաբերությունների հարցերով Վրաստանի վարչապետի նոր հատուկ ներկայացուցիչ Գեորգի Զուրաբաշվիլիի հետ։ Այս մասին երկուշաբթի հայտնել է «Իզվեստիա» թերթը՝ վկայակոչելով Ռուսաստանի արտաքին գործերի նախարարությանը։

«Գեորգի Զուրաբաշվիլիի հետ կապը հաստատված է։ Նրա ռուսաստանցի գործընկերը որոշված է․ դա Հարավային Կովկասի ուղղությունը համակարգող Ռուսաստանի արտաքին գործերի փոխնախարար Միխայիլ Գալուզինն է։ Ռուսաստանը մշտապես հանդես է գալիս Վրաստանի հետ գործնական և փոխշահավետ հարաբերությունների հաստատման օգտին»,- հայտնել են ՌԴ ԱԳՆ-ից։

Ռուսաստանի արտաքին գործերի նախարարությունից նշել են, որ բանակցությունների հիմնական ուղղությունները կլինեն առևտրի, զբոսաշրջության, տրանսպորտային հաղորդակցության և մշակութային փոխանակումների ընդլայնումը։

Հրատարակության տեղեկություններով՝ մի շարք ուղղություններով աշխատանքն արդեն սկսվել է։ Մասնավորապես, երկու երկրների գյուղատնտեսական գերատեսչությունների ներկայացուցիչները փորձում են պարզեցնել գյուղատնտեսական արտադրանքի փոխադարձ մատակարարումները։

Թերթը հիշեցնում է, որ Վրաստանի իշխանությունները հոկտեմբերի վերջին Ռուսաստանի հետ հարաբերությունների հարցերով նոր հատուկ ներկայացուցիչ են նշանակել։ Այդ պաշտոնը զբաղեցրել է երկրի արտաքին գործերի նախարարի առաջին տեղակալ Գեորգի Զուրաբաշվիլին։

Նշված պաշտոնը թափուր էր մնացել 2024 թվականի գարնանից։ Այժմ Թբիլիսին որոշել է վերսկսել Մոսկվայի հետ ուղիղ երկխոսությունը։

ՌԴ ԱԳՆ-ից հայտնել են, որ Ռուսաստանը ողջունում է Վրաստանի այս քայլը և հույս ունի, որ նոր նշանակումը խթան կհանդիսանա երկու երկրների միջև հարաբերությունների զարգացման համար։