Մեծ մասամբ մեր պետության ջանքերի շնորհիվ Երևանի և Բաքվի միջև ակնհայտ է դրական տեղաշարժ․ ՌԴ ԶՈւ ԳՇ պետ

Ռուսաստանի զինված ուժերի գլխավոր շտաբի պետ Վալերի Գերասիմովը օտարերկրյա ռազմական կցորդների համար կայացած ճեպազրույցում Կովկասում իրավիճակը բարդ է անվանել։

«Անդրկովկասում իրավիճակը բարդ է մնում։ Նրա զարգացման վրա ապակառուցողական ազդեցություն են ունենում արտատարածաշրջանային խաղացողների, առաջին հերթին ՝ ԱՄՆ-ի և Եվրամիության ձգտումները՝ ուժեղացնել դիրքերը տարածաշրջանում, պահել Վրաստանը և Հայաստանին ներքաշել իրենց ազդեցության ուղեծիր», - ասել է նա։

Զորավարն ընդգծել է, որ Արևմուտքը ձգտում է ապակայունացնել իրավիճակը՝ ֆինանսավորելով և ուղղորդելով բողոքի ակցիաները Վրաստանում։ Այդ փորձերը ցույց են տալիս շահագրգռվածություն՝ երկիրը ներքաշելու ակտիվ հակառուսական գործողությունների՝ ուկրաինական սցենարով։

Գերասիմովն ասել է, որ Ռուսաստանը կառուցողական քայլեր է ձեռնարկում այս տարածաշրջանում։

«Մեծ մասամբ մեր պետության ջանքերի շնորհիվ ակնհայտ է Երևանի և Բաքվի դրական առաջընթացը երկկողմ հարաբերությունների կարգավորման ուղղությամբ», - նշել է նա։