ԱՄՆ-ը դեմ է միակողմանի գործողություններին, հատկապես՝ Ադրբեջանի կողմից, որոնք սրում են իրավիճակը Ղարաբաղում. Բլինքեն

ԱՄՆ-ը դեմ է ցանկացած միակողմանի գործողությունների, հատկապես՝ Ադրբեջանի կողմից, որոնք միայն սրում են իրավիճակը Ղարաբաղում։ Այս մասին ԱՄՆ Կոնգրեսի Սենատի արտաքին հարաբերությունների հանձնաժողովում լսումների ժամանակ հայտարարել է ԱՄՆ պետքարտուղար Էնթոնի Բլինքենը։

Նա նշել է, որ ակտիվորեն և ուղղակիորեն շփվում է ինչպես Հայաստանի, այնպես էլ Ադրբեջանի ղեկավարության հետ։

«Վերջերս՝ մեկ շաբաթ առաջ, ես հեռախոսազրույց ունեցա Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի, ինչպես նաև երկու արտաքին գործերի նախարարների հետ՝ փորձելով խթանել Լեռնային Ղարաբաղի հարցի երկարաժամկետ քաղաքական կարգավորման հեռանկարները: Մենք, այս առումով, խթանում ենք վստահության ամրապնդման տարբեր ծրագրեր և միջոցառումներ։ Մենք դեմ ենք ցանկացած միակողմանի գործողությունների, հատկապես՝ Ադրբեջանի կողմից, որոնք միայն սրում են իրավիճակը»,- ասել է Բլինքենը։