Դամասկոսը հայտնում է, որ Իսրայելը հարձակվել է Սիրիայի հարավի վրա

Իսրայելը հրթիռներ է արձակել Սիրիայի հարավում գտնվող կառավարական ռազմական օբյեկտների ուղղությամբ։ Այս մասին հայտնում է SANA լրատվական գործակալությունը՝ վկայակոչելով Դամասկոսի պաշտպանական կառույցների աղբյուրները։

Հաղորդագրության համաձայն՝ չորեքշաբթի գիշերը օկուպացված Գոլանի բարձունքներից «ցամաք-ցամաք» հրթիռներով հարվածներ են հասցվել Քունեյթրա նահանգի ռազմական օբյեկտներին։

Սիրիայի այս հատվածում տեղակայված են նաև վարձկանների ջոկատներ՝ իրանական ԻՀՊԿ-ի սպաների հրամանատարությամբ, ինչպես նաև լիբանանյան «Հըզբոլլահ» շարժման ջոկատներ։

Զոհերի մասին տեղեկություններ չկան, նյութական վնաս է հասցվել ռազմական օբյեկտներին։

Սիրիան փետրվարի 17-ին հայտարարել էր իսրայելական հրթիռային հարվածների մասին մայրաքաղաք Դամասկոսի արվարձաններում։

Սիրիայում պատերազմի սկզբից Իսրայելը պարբերաբար հարվածներ է հասցնում Իրանի աջակցությունը վայելող խմբավորումներին և Ասադի ռազմական օբյեկտներին:

Իսրայելի պաշտոնյաները ձեռնպահ են մնում Սիրիայի վրա հարձակումները մեկնաբանելուց։