Որևէ անձի համար ո՛չ ճանապարհ ենք բացում, ո՛չ էլ փակում. ԲՀԿ պատգամավոր

ԲՀԿ խմբակցության պատգամավոր Գևորգ Պետրոսյանը խորհրդարանական այսօրվա ճեպազրույցների ժամանակ անդրադարձավ Սահմանադրական դատարանի թեկնածուի թափուր պաշտոնի հարցին: Նշենք, որ օրերս օրենքում ընդունված փոփոխությամբ` թափուր պաշտոնի համար առաջադրվելու է նոր թեկնածու:  «Նոր» եզրույթը ԲՀԿ-ական պատգամավորները միանշանակ չէին ընդունել:

««Նոր» եզրույթը մեկնաբանում ենք հետևյալ կերպ` հանրապետության նախագահի կողմից արդեն իսկ առաջադրված թեկնածուն համարվում է նոր թեկնածու, քանի որ նա որևէ գումարման Ազգային ժողովի ժամանակ չի առաջադրվել: Հիմա առաջադրված թեկնածուի ընտրվելու դեպքում կշնորհավորենք, չընտրվելու դեպքում` նախագահը կարող է առաջադրել այլ անձ, այդ թվում` նաև այն անձին, որին նախորդ գումարման ժամանակ առաջադրել են, բայց նա խորհրդարանում ձայների մեծամասնություն չի ստացել»,- ասաց Պետրոսյանը:

Պատգամավորը ևս մեկ անգամ ընդգծեց` ԲՀԿ-ն որևէ թեկնածուի առաջադրմամբ մտահոգված չէ:  «Որևէ անձի համար ո՛չ ճանապարհ ենք բացում, ո՛չ էլ փակում: Եթե որևէ ներդրում չունենք տվյալ անձի առաջադրման հարցում, ապա նվազագույնի է հասնում անձնական շահագրգռվածության մեջ մեղադրելու գործոնը: Պարզապես մեր խնդիրն այն է, որ իրավական նորմը կիրառվի որոշակիությամբ, իսկ դրա հետագա կիրառումը զերծ մնա հակասական մեկնաբանություններից»,- նշեց Պետրոսյանը: