Ֆիլիպիններում ափ նետված կետի մահվան պատճառը 40 կգ պոլիէթիլենային տոպրակներն են

Ֆիլիպիններում ափ նետված երիտասարդ կետը, որի ստամոքսում 40 կգ պոլիէթիլենային տոպրակ է հայտնաբերվել, սատկել է «ստամոքսային շոկից»: Այս մասին հայտնում է  theguardian.com-ը:

Միջադեպը տեղի է ունեցել Մինդանաո կղզում: Կենսաբաններն ապշել են, երբ պարզել են կաթնասունի սատկելու պատճառը: Կետի ստամոքսում հերձման արդյունքում հայտնաբերվել են բրնձի, բանանի և առևտրային այլ տոպրակներ:

Լուսանկարներում երևում են ստամոքսից հանված պոլիէթիլենային տոպրակները և պլաստիկը:

«Այս ամենը պարզապես զազրելի է: Կառավարությունը պետք է քայլեր ձեռնարկի նրանց դեմ, ովքեր ծովերին ու օվկիանոսներին վերաբերվում են աղբանոցների պես»,- հայտարարել են D’ Bone Collector Museum թանգարանի կենսաբանները:

2017թ. տվյալներով՝ Չինաստանը, Ինդոնեզիան, Ֆիլիպինները, Թաիլանդը և Վիետնամն ավելի շատ պլատիկ են թափել համաշխարհային օվկիանոս, քան մնացած պետությունները: