Հայտնի է, թե ով կփոխարինի Շիրակի պետական համալսարանի ռեկտորին. նախարարն այցելել է բուհ

Այսօր կրթության և գիտության նորանշանակ նախարար Արայիկ Հարությունյանն այցելել էր Շիրակի պետական համալսարան: Լրագրողների հետ զրույցում նախարարը տեղեկացրեց, որ Շիրակի պետական համալսարանի ռեկտոր Սահակ Մինասյանն ազատման դիմում է ներկայացրել: Առայժմ բուհի ռեկտորի պաշտոնակատար կնշանակվի ռեկտորի տեղակալ Երվանդ Սերոբյանը:

«Ինձ համար այս պրոցեսում անընդունելի էր ոչ ակադեմիական մթնոլորտը, երբ փոխադարձ վիրավորանքների պայմաններում քննարկվում էին Շիրակի պետհամալսարանի ներքին խնդիրները»,- ասաց նախարարը:

Նրա խոսքով` ռեկտորի պաշտոնից ազատման դիմում ներկայացնելը լուրջ քայլ էր Սահակ Մինասյանի կողմից: «Սա փոխզիջումային տարբերակ է, որ լարվածությունը հանդարտվի: Ես դասախոսական կազմին կոչ արեցի այսուհետ չսրել իրավիճակը, սա լուծում է, որ թույլ կտա դուրս գալ ստեղծված իրավիճակից»,- ասաց Հարությունյանը:

Նրա խոսքով` ցանկացած ոլորտում մարդիկ հնարավորություն ունեն ինքնադրսևորվելու:

Հիշեցնենք, որ, բուհի ռեկտոր Սահակ Մինասյանից բացի, հրաժարական է տվել նաև բուհի խորհրդի նախագահ, ՀՀԿ-ական նախկին պատգամավոր Ֆելիքս Ցոլակյանը: