Մարզպետ Աշոտ Սիմոնյանն այցելեց Թալինի տարածաշրջան

Տարեվերջին Արագածոտնի մարզպետ Աշոտ Սիմոնյանն այցելություններ է կատարում մարզի տարածաշրջաններ եւ քաղաքացիների ընդունելություն կազմակերպում համայնքներում:

Դեկտեմբերի 23-ին Թալինի քաղաքապետարանում նա ընդունելություն անցկացրեց Թալինի տարածաշրջանի քաղաքացիների համար, որին մասնակցեցին բոլոր համայնքների բնակիչները: Մարզպետի հանձնարարությամբ համայնքապետերը նախապես իրազեկել էին բնակիչներին եւ աշխատանք տարել, որպեսզի ընդունելությանը ներկայանան առավել կարիքավոր ընտանիքները: Ամանորի նախօրեին դրամական աջակցություն ստացավ, ընդհանուր առմամբ, 92 քաղաքացի: Նրանցից ոմանք մարզպետին դիմեցին նաեւ իրենց մտահոգող այլ հարցերով, որոնց  հնարավորինս լուծումներ տրվեցին:

Այցի ընթացքում Աշոտ Սիմոնյանը հանդիպեց նաեւ  համայնքապետերի հետ: Ամփոփվեցին անցնող տարում իրականացված աշխատանքները եւ   քննարկվեցին առաջիկա ծրագրերը:

 Առաջիկա օրերին նախատեսվում է մարզպետի այցը նաեւ Արագածի եւ Ապարանի տարածաշրջաններ:

ՀՀ Արագածոտնի մարզպետարանի տեղեկատվության եւ հասարակայնության հետ կապերի բաժին