Հիմա գոնե հեղափոխություն անելու ժամկետները հետաձգում են. Դավիթ Հարությունյանը հեգնեց

Այսօր խորհրդարանում լրագրողների հետ զրույցում արդարադատության նախարար Դավիթ Հարությունյանը, անդրադառնալով Րաֆֆի Հովհաննիսյանի՝ հեղափոխություն անելու մասին հայտարարությանը, նշեց, որ տարիներ շարունակ խոսվել է հեղափոխության մասին:

«Տարիներ շարունակ թավշյա հեղափոխության մասին խոսողները ասում էին` վաղը, վաղը: Հիմա գոնե մի քանի ամիս հետաձգում են, դա ողջունելի է»,- ասաց նա` միաժամանակ նշելով, որ իրենց հետաքրքիր է լսել ընդդիմադիր գործիչների քննադատությունները, եթե դրանք կառուցողական են:

Նախարարի կարծիքով՝ եթե խոսքը վերաբերում է հեղափոխությանը, ապա դրան համապատասխան արձագանք կա: «Հեղափոխության դեպքում յուրաքանչյուր պետությունում արձագանքը կլինի շատ կոշտ»,- հայտարարեց նա:

Հարցին՝ ի՞նչ նկատի ունի` կոշտ արձագանք ասելով, Հարությունյանն արձագանքեց. «Ցանկացած հեղափոխություն, եթե խոսքը բռնի ուժով հեղափոխության մասին է, ենթադրում է, բնականաբար, ազդելու միջոցներ, որովհետեւ խոսքը վերաբերում է սովորական քրեական հանցագործությանը»:

Իսկ ինչ վերաբերում է կոնկրետ Րաֆֆի Հովհաննիսյանի` «թավշյա հեղափոխություն» արտահայտությանը, նա նշեց, որ լավ չի հասկանում, թե ինչ ասել է` թավշյա հեղափոխություն:

Հիշեցնենք, որ Րաֆֆի Հովհաննիսյանը հայտարարել էր` եթե նախագահ Սարգսյանը մնա, ապա կարող է «թավշյա հեղափոխություն» լինել: