Ձերբակալություններ՝ Էրդողանի այցի ընթացքում ԱՄՆ-ում Թուրքիայի դեսպանատան մոտ ծեծկռտուքի գործով

ԱՄՆ-ում երկու թուրք է ձերբակալվել անցած ամիս Թուրքիայի նախագահ Ռեջեփ Թայիփ Էրդողանի այցի ընթացքում դեսպանի նստավայրի մոտ տեղի ունեցած ծեծկռտուքի գործով:

Ըստ Asbarez-ի՝ Վաշինգտոնի ոստիկանությունը հաղորդել է, որ ձերբակալվածներից մեկը Սինան Նարինն է՝ Վիրջինիայից, մյուսը` Էյուփ Յըլդըրըմը՝ Նյու Ջերսիից, որոնք մեղադրվում են խաղաղ ցուցարարների վրա հարձակվելու համար:

Կայքի հաղորդմամբ՝ Յըլդըրըմը Նյու Ջերսիում շինարարական ընկերության սեփականատեր է:

BuzzFeed News-ի հետ զրույցում ԱՄՆ պետդեպարտամենտի պաշտոնյան նշել է, որ իրենք վճռական են մայիսի 16-ին տեղի ունեցած այդ մտահոգիչ բռնության մեղավորներին պատասխանատվության ենթարկելու հարցում:

Ամերիկացի պաշտոնյաները նշել են, որ ոստիկանությանը հաջողվել է պարզել ծեծկռտուքի 42 մասնակիցներից 34-ի ինքնությունը, և չի բացառվում, որ առաջիկայում լինեն նոր ձերբակալություններ:

Հիշեցնենք, որ Թուրքիայի նախագահ Էրդողանի` ԱՄՆ այցի ընթացքում նրա թիկնապահներն ու կողմնակիցները հարձակվել էին խաղաղ ցուցարարների՝ հայերի, հույների, քրդերի և եզդիների վրա, ինչի հետևանքով ինը մարդ էր վիրավորվել: Հետագայում Հայ Դատի հանձնախումբը նաև տեսանյութ էր հրապարակել, որում երևում էր, թե ինչպես է Էրդողանն անձամբ հրահանգում խաղաղ ցուցարարների վրա հարձակվել: