Բան Կի Մունը դատապարտել է Ուկրաինայի աշխարհազորայիններին, զսպվածության կոչ արել բանակին

ՄԱԿ-ի գլխավոր քարտուղար Բան Կի Մունը դատապարտել է զինված խմբերի գործողությունները Դոնեցկի և Լուգանսկի շրջաններում, նաև զսպվածության կոչ արել ուկրաինական բանակին: Այս մասին հայտնում է lenta.ru-ն` վկայակոչելով ՄԱԿ-ի մամուլի ծառայության տեղեկությունները:

Բան Կի Մունը աշխարհազորայինների գործողություններն անվանել է ապօրինի: Ինչ վերաբերում է Ուկրաինայի իշխանություններին, ապա նրանց գլխավոր քարտուղարը կոչ է արել անել ամեն հնարավորը, որպեսզի երաշխավորվի այդ շրջաններում քաղաքացիական բնակչության պաշտպանությունը:

«Հիմնարար կարևորություն ունի հրադադարի ռեժիմի վերականգնումը, որը պետք է պահպանի համակարտության երկու կողմն էլ: Անհրաժեշտ է շարունակել քաղաքական և դիվանագիտական գործընթացը` բռնության վերջնական դադարեցման և ճգնաժամի խաղաղ կարգավորման համար»,- հայտարարել է ՄԱԿ-ի գլխավոր քարտուղարը: