ՄԱԿ-ը «Բոկո Հարամը» հայտարարել է ահաբեկչական կազմակերպություն

ՄԱԿ-ի Անվտանգության խորհու8դը «Բոկո Հարամի» արմատական իսլամականներին պաշտոնապես ճանաչել է որպես ահաբեկչական խմբավորում, որը կապված է «Ալ Քաիդա»-ի հետ։ Այս մասին հայտնում է BBC-ն։

ՄԱԿ-ը նաև պատժամիջոցներ է սահմանել խմբավորման դեմ, որը պատասխանատու է Նիգերիայում մի շարք հարձակումների և 300 աշակերտուհու առևանգման համար։ Պատժամիջոցները ներառում են «Բոկո Հարամի» ակտիվների սառեցում, վիզային ռեժիմի սահմանափակումներ և զենքի մատակարարման արգելք։

«Բոկո Հարամի» ահաբեկիչները Նիգերիայի կառավարության դեմ զինված պատերազմ են մղում 2009 թվականից։ Իսլամականների գործողությունների պատճառով զոհվել է մի քանի հազար մարդ, հիմնականում` Նիգերիայի հյուսիս-արևելքում։ Ընդհանուր առմամբ, ահաբեկչական խմբավորման գործողություններից այս կամ այն կերպ տուժել է մոտ 3 միլիոն մարդ։

Ներկայումս «Բոկո Հարամը» ղեկավարում է Աբուբաքար Շեքաուն։